Goierriko Hitza

'Gronholm metodoa' antzezlana eskainiko du gaur Txalo taldeak

Lazkao Udako ikastaroen barruan eskainiko dute antzezlan txalotu hau; lau aktore ezagun igoko dira plazako eskenatokira.

a. apalategi

Lazkaoko Maizpide euskaltegiak antolatu duen udako egitarauaren barruan, Gronholm metodoa antzezlana ikusteko aukera izango da gaur gaueko 22:00etan, herriko plazan. Txalo konpainiak urte honen hasieran aurkeztu zuen obra ezagunaren euskarazko egokitzapena, eta harrezkero, herriz herri ibili dira emanaldiak eta saioak eskaintzen.

Lau aktore ezagun igoko dira plazako eskenatokira: Ramon Agirre, Joseba Apaolaza, Asier Hormaza eta Itziar Ituño. Laurak, multinazional batean lan egiteko hautagaiak dira, baina enpresara iristean, hautaprobarako metodo berezi bat erabiltzen dutela ikusiko dute.

'Euskaraz Bai' erakusketa

Bestalde, udako ikastaroen barruan, Euskaraz Bai erakusketa zabalduko dute astelehen iluntzeko 19:00etan. Aurkezpenean, Kontseiluko Zigor Etxeburua eta San Benito ikastola, Goierriko Euskal Eskola eta Maizpideko ordezkariak izango dira. Kultur Etxean egongo da ikusgai, ostiralera arte.