Goierriko Hitza

2008-07-03 | 11:07:30

Adin txikiko etorkinak bizi diren Lazkaoko hotel batean sua piztu da

Gela batean sortu da sutea, eta ez da eraikinera zabaldu. Gaztetxo bat erietxera eraman dute, orkatila bihurritu duelako

Lazkaoko Zubierreka industrialdean dagoen Lazkao Hotelean sutea izan da gaur goizean. Adin txikiko etorkinak ostatu hartuta dauden gela batean piztu da sua, arduradunek adierazi dutenez ohe bati su emanda. Suhiltzaileek 09:50ean jaso dute abisua, eta ordu erdiren buruan kontrolatu dute sutea. Hiru unitate bertaratu dira. Garrak ez dira eraikinaren gainontzeko geletara zabaldu. Lehenengo solairutik salto egin duen gaztetxo bat erietxera eraman behar izan du anbulantziak, orkatila bat bihurrituta. Kea arnasteagatik beste egoiliar batzuek ere arazo arinak izan dituzte, baina ez dute ospitalera joan beharrik izan. Lazkaoko hotelean adin txikiko 9 etorkin bizi dira, Foru Aldundiaren zaintzapean.

12 erantzun

2008-04-30 | 13:36:04

Lazkaomendiko taldeak errebantxa hartu du, herri kirol saioa irabazita

Bihar bukatuko dira Lazkaoko San Prudentzio jaiak

Koadrilen eguna ospatzen ari dira gaur Lazkaon. Eguneko ekitaldi nagusietako bat, Lazkao eta Lazkaomendiko gazteen arteko herri kirol saioa izan da. Iaz, kaletarrak izan ziren nagusi, baina aurten, errebantxa hartu du Lazkaomendiko taldeak. Besteak beste, aizkoran, harrijasotzen, trontzan, txingatan edota asto karreran aritu dira. Apustuak ikusmina sortu du herritarren artean, eta jende ugari bildu da plazaren bueltan.

Ez du erantzunik

2008-04-25 | 12:49:43

Haurrek estreinatu dituzte festak Lazkaon

Goizean ikasgelak utzi eta barraketan jolasean ibili dira

Lazkaoko haurrentzat egun berezia izan da gaurkoa. San Prudentzio festak hasten direla eta, pare bat orduz ikasgelak utzi eta atarian dituzten barraketara joan dira. Korrika, pozez zoratzen eta joko guztiak probatu nahian ibili dira Haur Hezkuntzako eta Lehen Hezkuntzako umeak. Jaien haserako txupinazoa zazpietan botako badute ere, haurrak izan dira festak estreinatzen lehenak.

• Piratak, aurtengo pegatinen gaia
• Goi mailako pilota ikuskizuna gaur

Ez du erantzunik

2008-04-10 | 16:15:48

Euskal Herriko Wu Shu Kopa jokatuko dute bihar Lazkaon

Euskal Herriko eta atzerritik etorritako 300 lagunek parte hartuko dute

Wu Shua, "arte martzial guztien ama" dela diote. Bere baitan, 20 bat modalitate ezberdin biltzen ditu, tartean borroka edota arma zuriak, baina baita musikarekin lagunduta egiten diren forma eta estilo tradizionalak ere. Goizean zehar, haur eta gaztetxoen erakustaldia izango da Lazkaoko kiroldegian. Arratsaldeko 15:00etan berriz, helduen mailako lehia hasiko da. Gipuzkoa eta Euskadiko txapelketak jokatuko dituzte aurrena, eta ondoren, Euskal Herriko Kopa jokatuko dute bertako eta atzerritik etorritako kirolariek. Arratsaldeko 17:30etik aurrera berriz, Wu Shuaren modalitate ezberdinen erakustaldia egingo dute, musika eta jantzi koloretsuekin lagunduta.

Ez du erantzunik

2008-04-02 | 09:28:34

Lazkao Txiki gogoratuko dute, hil zeneko 15. urteurrenean

Duela hamabost urte, biharko egunez hil zen Joxe Migel Iztueta 'Lazkao Txiki' bertsolari ezaguna

Joxe Migel Iztueta 'Lazkao Txiki' hil zela hamabost urte beteko dira bihar. Hau dela eta, bere omenez hainbat ekitaldi antolatu dituzte egun hauetarako. Ekitaldi hauekin, Lazkao Txiki nor izan zen gogoratu eta ondorengoei transmititu nahi diete. Ostiral gaueko 20:30ean, bertso-afaria egingo dute Lazkaomendiko Lartxai Elkartean. Bertan, Aitor Sarriegi eta Aitor Mendiluze bertsolariek parte hartuko dute. Igande eguerdian berriz, urteroko jaialdia egingo dute Lazkao Txikiren izena daraman plazan. Besteak beste, dantzariak, bertsolariak eta herriko musikariak izango dira.

Ez du erantzunik

2008-02-20 | 19:53:19

Egunkaria auzia salatu dute, itxi zuteneko bosgarren urteurrenean

Lazkaon elkarretaratzea egin dute iluntzean

Espainiako Auzitegi Nazionaleko Juan del Olmo epailearen aginduz, Euskaldunon Egunkaria itxi zuten duela bost urte. Gertakari hura eta ondorengo auzia salatzeko, elkarretaratzea egin dute gaur iluntzean Lazkaoko plazan. 70 bat lagun elkartu dira 'Egunkaria libre' zioen pankartaren atzean, tartean, euskalgintza, kultura eta politika munduko jendea. Protesta ekitaldia amaitzeko, Andoni Egañak auzi honen harira egindako bertsoak kantatu zituzten.

Erantzun 1

2008-02-16 | 13:21:05

Gizonezko bat atxilotu dute Lazkaon droga trafikoa leporatuta

70 gramo kokaina zeramatzan, Herrizaingo sailaren arabera

Ertzaintzak 38 urteko gizonezko bat atxilotu zuen atzo Lazkaon, drogra trafikoan aritzea leporatuta. Herrizaingo Sailetik azaldu dutenez, Ertzaintzak hilabeteak zeramatzan gizonezko hau ikertzen, droga trafikoan aritu zitekeelakoan. Susmoak baieztatu ondoren, atzo geldiarazi zuten gizona, eta 70 gramo kokaina zeramatzan soinean. Berehala atxilotu zuten.

Ez du erantzunik

2008-01-14 | 15:48:21

Mimi eta Urtain izendatu dituzte Astotxo Eguneko astorik ederrenak

Jendetza bildu zen atzo Lazkaoko plazan eta Egiptorako Ihesa antzezlanean

Atzo ere jendetza bildu zen Lazkaon, euskal astoari omenaldia egiteko. Gipuzkoako IX. Asto Lehiaketa ere jokatu zen, eta Mimi eta Urtain aukeratu dituzte asteme eta astar ederrenak. Domingo Arriola elgoibartarra da Mimiren jabea, eta aurten, bigarren aldiz jaso du saria. Gustora agertu da Arriola, eta bere astoak "neurri perfektuak" dituela azaldu du. Lehiaketaren ondoren, Egiptorako Ihesa antzeztu zuten 150 lazkaotarrek. Lazkao Txiki plazaren inguruan ere jendetza bildu zen.

• Astotxo eguneko argazkiak ikusgai

2 erantzun