Goierriko Hitza

2009-06-30 | 19:38:24

Lazkaoko PSEren egoitza berriz ireki dute, lau hilabeteko lanen ondoren

Otsailaren 23an bonba bat lehertarazi zuen ETAk Lazkaoko sozialisten egoitzan; berrikuntza lanak bukatuta, berriz ireki dute.

Lau hilabetez berrikuntza lanetan aritu ondoren, berriro zabaldu dute Lazkaoko PSEren egoitza. Gaur iluntzean egin dute irekiera ekitaldia, PSE-EEko ordezkariak eta Lazkaoko militanteak bertan zirela. Herriko etxea erabat txikituta gelditu zen otsailaren 23an, ETAk bonba bat lehertarazi zuenean. Hauteskundeen atarian egindako eraso hark, nahasmen handia sortu zuen herrian, eta baita Euskal Herriko politikagintzan ere. Besteak beste, Rafaela Romero, Iñaki Arriola, Jesus Egiguren eta Joan Manuel Serna izan dira ekitaldi honetan.

• Otsaileko gertakariak Lazkaon

Ez du erantzunik

2009-06-26 | 16:48:19

Garikoitz Bravo bigarren sailkatu da Espainiako erlojupeko txapelketan, 23 urtez azpiko mailan

Aser Estevez (Galizia) irabazleak baino 25 segundo gehiago behar izan du 29 kilometroko ibilbidea pasatzeko

Garikoitz Bravo txirrindulari lazkaotarrak zilarrezko domina lortu du Espainiako erlojupeko txapelketan, 23 urtez azpikoen mailan. Atzo Santoñan (Kantabria, Espainia) jokatu zen txapelketan Aser Estevez (Galizia) irabazleak baino 25 segundo gehiago behar izan zituen ibilbidea osatzeko. Bravo Gipuzkoako eta Euskadiko txapeldun atera da aurten erlojupekoan, eta sasoiko dagoela erakutsi du Espainiakoan.

Ez du erantzunik

2009-06-06 | 17:07:42

Juan Joxe Agirre beneditarren artxibozainari eman diote 'Manuel Irujo Saria'

Berrogei urtez Euskal Herriko dokumentuak gordetzeko eta mantentzeko egin duen lana saritu dute

Juan Joxe Agirre Lazkaoko beneditarren komentuko artxibozainari eman diote gaur Lizarran (Nafarroa) 'Manuel Irujo Saria'. Berrogei urtean egindako "lan isilarengatik" eman diote saria, eta urte horietan guztietan 200.00 dokumentu baino gehiago pilatu ditu Agirrek bere artxiboan.

Ez du erantzunik

2009-05-04 | 13:33:31

Lazkaok plaza bateko aldearekin irabazi du Lazkaomendiren kontrako gizon proba

Herriko bi taldeen arteko erronkak ikusmin handia sortu zuen atzo, eta jendetza bildu zen Lazkaomendin

Lazkaomendiko festek argazki berezia utzi dute aurten. Izan ere, joan den urtean herriko gazteak astoaren kontrako lehian aritu baziren, aurten herriko bi talderen artean egin dute gizon proba. Erronkak ikusmina sortu zuen eta herritar ugari bildu zen atzo Lazkaomendin. Lazkaomendiko taldeak, 31 plaza egin zituen, denera, 784 metro. Lazkaotarrek berriz, plaza bat gehiago egitea lortu zuten, denera 817 metro eginda. Datorren urterako, errebantxa hartzeko gogoarekin gelditu dira Lazkaomendikoak.

Ez du erantzunik

2009-04-28 | 12:38:56

Zaindariaren eguna ospatzen ari dira gaur Lazkaon

Goizean San Prudentzio ermitara prozesioa egin dute, dantzariek eta txistulariek lagunduta

Azkenean eguraldia portatu da eta ehun bat lagun atera dira goizean, San Prudentzio eguneko prozesioan. Ermitarainoko bidea oinez egin dute, dantzariek eta txistulariek lagunduta. Behin ermitara iritsitakoan, agurra egin diote dantzariek San Prudentziori.

• Datozen orduetako egitaraua

Ez du erantzunik

2009-04-25 | 16:51:46

Euripean ari dira ospatzen Lazkaon jaietako lehen eguna, mozorrotuena

Eguerditik aurrera kalera irten dira lagun taldeak, mota askotako jantziekin

Euria, lanbroa dute lagun goiz-goizetik lazkaotarrek gaur. San Prudentzio jaiak atzo iluntzean hasi ondoren, gaurkoa (larunbata) mozorrotuen eguna dute. Eguerdi partean hasi dira lagun taldeak eta norbanakoak kalera irteten, gehien-gehienak mozorrotuta, ohiturak tradizio handia duela beste behin agerian utziz.

Ez du erantzunik

2009-04-17 | 13:10:00

Madalena auzoko garajeen zozketa maiatzaren 6an egingo dute

Denera 36 aparkaleku zozkatuko dituzte; eskaerak egiteko epea asteazkenean bukatuko da.

Lazkaoko Santa Madalena auzoan lurpeko aparkalekuak egiten ari dira. Denera 36 garaje plaza egingo dituzte, eta hauetakoren bat lortu nahi duenak, maiatzaren 6an egingo den zozketan parte hartu beharko du. Horretarako, hilaren 22a baino lehen eman behar da izena. Etxez etxe banatu duten informazio orrian dagoen formularioa bete eta Lazkaoko udaletxeko erregistrora jo behar da.

Ez du erantzunik

2009-03-27 | 19:00:42

Jendetza bildu du ikasleen Elkartasun Festak

Elkartasun Asteko egitaraua bukatzeko, ikastolako ikasleek jaialdia eman dute Areria zineman

Arratsaldeko festa jendetsuarekin itxi dute San Benito Ikastolako ikasleek aurtengo Elkartasun Astearen egitaraua. Seietan hasi da festa; ordurako gurasoek eta senideek beteta zituzten Areria zinema aretoko haulkiak. Jaialdia trikiti doinuekin lagunduta hasi dute gaztetxoek. Aurkezpena, berriz, bertsoak eta olerkia uztartuz egin dute. Segidan kantaldia, musika saioa eta ikasleen antzezlana eskaini dituzte. Jaialdia bukatzeko, ikasle guztiek ikastolaren kanta abestu dute elkarrekin.

Ez du erantzunik